Ինտերնետ խանութ․ որտեղից սկսել և ինչ սխալներ են ամենաթանկը

Չորս որոշում մինչև ծրագրավորողը

Այս չորսի պատասխանները որոշում են կայքի կառուցվածքը։ Առանց դրանց ցանկացած գնահատական մոտավոր է։

• —Վճարում․ քարտով օնլայն, թե՞ առաքման պահին։ Օնլայն վճարման համար պետք է բանկի հետ պայմանագիր, և դա ժամանակ է խլում
• —Առաքում․ ձեր կուրիե՞րը, թե՞ ծառայություն։ Ինչքա՞ն է արժենում Երևանում և մարզերում
• —Պահեստ․ ո՞վ և ինչ պարբերականությամբ է թարմացնում առկայությունը։ Չկա բան, որ ավելի արագ սպանի վստահությունը, քան «պատվիրեցի, հետո զանգեցին՝ չկա»
• —Վերադարձ․ քանի՞ օր, ո՞ւմ հաշվին է հետդարձի առաքումը

Լուսանկարները վաճառում են, ոչ թե տեքստը

Օնլայն գնորդը չի կարող ձեռք տալ ապրանքին։ Լուսանկարը փոխարինում է շոշափելուն։ Մեկ ապրանք՝ նվազագույնը երեք կադր՝ ընդհանուր տեսքը, մանրամասնը և օգտագործման պահը։

Միասնական ֆոնն ու լույսը ավելի կարևոր են, քան թանկ ֆոտոխցիկը։ Խայտաբղետ կատալոգը թվում է սիրողական՝ նույնիսկ լավ ապրանքի դեպքում։

Ինչն է ամենից հաճախ ձախողում խանութը

• —Զամբյուղ, որը պահանջում է գրանցում մինչև գնումը
• —Առաքման գինը, որ երևում է միայն վերջին քայլին — ամենահաճախ հանդիպող լքման պատճառը
• —Հեռախոսի տարբերակ, որտեղ կոճակները փոքր են և ֆորմը լրացնելը տանջանք է
• —Բացակայող ապրանքներ, որ մնում են կատալոգում
• —Պատասխան չկա․ հաճախորդը գրում է դիրեկտ, պատասխանում են հաջորդ օրը

Ինչպես սկսել փոքր

Եթե բյուջեն սահմանափակ է, ճիշտ հերթականությունը՝ սկզբում ապացուցել, որ ապրանքը գնում են, հետո կառուցել մեծ համակարգ։ Դրա համար բավական է կատալոգ՝ պարզ պատվերի ձևով և վճարում առաքման պահին։

Երբ պատվերները դառնում են օրական տասնյակներ, ձեռքով վարելը սկսում է սխալվել — այդ պահին արդեն իմաստ ունի ավտոմատացնել պահեստն ու վճարումը։